Luk 5 | BEF | STEP | Mone yupahi Yesu Genesalete hefupomofihi kehetoga ho tiloto nohigo Hu'mamofihi ka'a kehelilune lite ai nohinalo babu bona'i ikini ikini hite e'ahana yabe.

Luke 5

Yesu yata'a koko pana'a kehe i'ehina yabe

Mt 4:18-22; Mk 1:16-20

1 Mone yupahi Yesu Genesalete hefupomofihi kehetoga ho tiloto nohigo Hu'mamofihi ka'a kehelilune lite ai nohinalo babu bona'i ikini ikini hite e'ahana yabe. 2 Ya nehago ai bu golago binaga boti loemo nagami beletoga neti'igo bu go'ehina yabe. To ana botilo bomagi enali faya gutalafa'ani okala hilune'mu botiguti aleke he malago yabe. 3 Yesu mone botigu ti'ehina. Ya'mana boti Simonihi boti ni'igo loka hago nagami folagaha'agu nesi'asi fitu fo molo'ehina. Ya hulago Yesu botigu nohuto bona'i kaga lu enelepi'ehina.

4 To Yesu kaga lu epi su holoto Simonihi lu emito lu'ehina: Botika nesi'asi fitu fetogo nagami hefuha'agu bulenogo kalalukagi hiti faya gutalafa lilago limilete melete halabe. 5 Simoniu ka'alo lu'ehina: Sipi Bo, lali asaga'i yatai folugu'i faya gutalafa moloto nohunogo go'i lu'ehina mone nesi'a meho'ohuta yabe. Ya hu'ohutamo ninaya kai lata kemege'i moloto faya gutalafa aku'i he'minogo'ni limilibe. 6 Ya luto ligo enali baga liyafa hite faya gutalafa'ani li he'mi etago limilago faya'i ti bai telete i bili mo ite faya gutalafa'ani i bolala ise'na hu'ehina yabe. 7 Ya higo enalalu'anigihi fato botigu nehana'amo enehe'malabe lite kehe i'ahana. Enali ete loe sana sana botigu faya'i li bai te su helago ana boti keta huloto nagamilugu ma'asi limise'na hu'ehina. 8 To Simoni Pitau huto hinana bu goloto lapusa nohi Yesuhi bulo melugu minoto lapusa filoto lu'ehina. Sipi Bo, he'mi netoto abufa hubo. Nani bo foipa'a nohube, luto lu'ehibe. 9 Ai hiti to luga'a enalalu'anigi hiti minana babu faya'i linana bu gelete enelesa sipi lu'ehina. 10 Sebetihi loe pana'a Yemesiugo Yoniugo etali Simonihi lalu'afugo etali ana hite etelesa lu'ehina. To ya hago Yesu Simonihi lu emi'ehina: Koli mehubo. Yatai faya'i kefefe hilata lili'nalo ya'ma Hu'mamofi kumu boana'i kefefe hilata bo suhi huto lenele'mo ho tilube. 11 Ya luto kaga lulago enali boti nagami beletoga ite bite melelete asaga'na analo nehe'mite Yesuhi mege'i lifite bi'ahana yabe.

Yesu bo mone gi yahi sibina hina bo le'mo bati hu'ehina yabe

Mt 8:1-4; Mk 1:40-45

12 Mone yupahi Yesu hepa'i monelugu nohigo bo mone sipi lepolosi hepuha'auba gufa'alo bai toto minana bo mino'ehina. To ai Yesuhi bu goloto okabagati lapusa nohi fito nunumu hu emito lu'ehina: Sipi Bo, kaikamo nele'mo gololo tilata bati huto ni'ifihe? 13 Yesu gufa'alo yahi mololoto lu'ehina: Nani ya'ma bati huto gololo tilane'mu nokehelube. Ya noligo analo'i mele'isi ana sipi lepolosi hepuha'a i gololo tu eto'ehina. 14 Ya hulago Yesu amuya moloto ekesa bi'ehina: Kai ya'ma hunanamofihi bona'i lu meepise kigi bito mono bo nohilinalo bitogo ai kugufaka beloloto bu kogolenogo kai kugufa gololo tinalo nona'a tu lokiya fi emibo. To Mosehi ka'auba lu'ehina'a huto yabe. Ya hitogo asaga bona'i enali yatai agololo ti'ahane lilabe. 15 To Yesu hinanamofihi ka'a asaga hepatoga bu baga ilago babu bona'i kaga'a kehelilune'mu e'ahana. To enebesise'na'ani hiti li he'mi epalalibe lite aitoga e'ahana yabe. 16 Ya hu'ehinaya ai asaga yupahi he'miloto bona'i menehana suguna hinaluga buto nunumu hulata hu'ehina yabe.

Yesu gi yahi sibina hu'ehina bo le'mo bati hu'ehina

Mt 9:1-8; Mk 2:1-12

17 Mone yupahi Yesu boana'i kaga lu epita minanalo keya ka tisa bo to Felosi bo mine'ahana. Enali asaga hepatoti Galili to Yutia kapoguti to Yelusale hepatoti e'ahana. To Hu'mamofihi amuya'auba Yesu hiti minago enebesise bona'i enele'mo bati hu'ehina yabe. 18 To bona'i luga'amagi bo mone felisa'a asaga'i fili'ehina bo sipalo le'me melete kofite e'ahana. Enali nonuga le'mete tite Yesu nohina bufasilo malalune'mu hi'ahana. 19 To babu boana'magi kapo i hekini lete minago enali ana besise bo le'mete nonuga tilana kapo'mu sa sa hi'ahana. To enali nohupitalo le'mete tilete hokolo kapo mone lolo hi'ahana li hokolo hilete ana kapoguti ana bo sipa'a hiti he'mi etago babu boana'magi folagaha'anigu Yesu nohinalo limi'ehina. 20 To Yesu ai komopa'anigu keheli amuya mele'ahanamofihi bu goloto lu'ehina: Nalalu'niga foipanaka ali nohe'mi ketobe. 21 To keya ka enelepise bona'i to Felosi bona'i Yesu hinana bu gelete kaga ai lu emigo ai lu emigo hite li'ahana: Ya'ma bo kuyu'afu Hu'mamofihi bulo kele'me ka nolu etabe? To bo moneuba foipana'ani li mehe'mi epalalina'mu yabe. To Hu'ma aisigo ya hilina'mu yabe. 22 Yesu kaga nelana akeheliloto lu epi'ehina: Henabe lite lenali lenekesagu kaga fato fato'i lenipaguti notibe? 23 To hena kauba keta mehu'ehibe? To foipanaka li nohe'mube luna kauba keta mehu'ehifi to kai ho tito kapo molobo luna kauba mehu'ehibe? 24 To nani amuya'ni lenelepilube'mu lu hokolo huto lu lepilube. Kokulumaguti limi'ehina Bouba foipana li he'milinamofihi ma melugu amuya'a li'ehibe. To gi yahi sibina hu'ehina bo lu emito lu'ehina: Nani lu nokumube, ho tito sipaka lito hepakaga bubo. 25 Ana baga hiti ana bo asaga bona enubulo ho tiloto koloto mino'ehina sipa'a nolito Hu'mamofihi fokehi homo homo huto hepa'aga bu'ehina yabe. 26 To asaga bona'i topa hete afoya gofa ilete Hu'mamofihi gi'a li saga hite li'ahana: Yatai fato huse'i hetofana bu gone lite li'ahana yabe.

Yesu Libaihi kehe i'ehina

Mt 9:9-13; Mk 2:13-17

27 Alihi Yesu kapo moloto buto bo mone takisi nolina ai gi'a Libai yabe, ai takisi nonugu nohigo bu goloto ana bo lu emito lu'ehina: Kai nemege'i moloto obo. 28 To Libaiu ho tiloto asaga'na analo nohe'mito Yesuhi mege'i moloto bu'ehina yabe.

29 Libaiu noha'agu sipi nose'na Yesuhi go etago takisi nelina bo to bona'i luga'amagi hiti ete etali hiti minete nose'na ne'ahana yabe. 30 To Felosi bona'i to keya kamofihi tisa bona'i luga'a enali ana nagaluguti Yesuhi koko pana'amagi lu epite li'ahana: Lenali henabe lite takisi nelina bona'i hiti to foipa bona'i hiti nose'na nenabe? 31 To Yesu ka'ani akeheliloto lu epi'ehina: To bona'i meepesina bona'i tota bologa menebabe. To enebesina bonalogo tota bologa bulata nehabe. 32 Nani bona'i foipana'ani menelina bona'i enele'mo bati hilube'mu meo'ohuna yabe. O'e. Nani foipa bona'i kehe inogo'ni komopa'ani i gelehe hise nehanamagi enali kumu oto enubuto biluna'mu yabe, Yesu ya luto lu'ehina.

Nose'na mo sito minosemofihi ka'a

Mt 9:14-17; Mk 2:18-22

33 Bona'i mone'amagi Yesutoga ka li'ahana: Yonihi koko pana'amagi nose'na mo site minete nunumu asaga yupahi nehabe. To ana hite Felosi bomagi koko pana'ani ana suhi nehabe. To kai koko panakamagi nose'na noba noba nehite mo site menehabe. 34 Yesu lu epi'ehina: Lenali bo moneuba liha'a lilenogo ana a'mofihi bona'a alana melekehi ite nose li mo silana ni'ifiye? Ana yupahi ya'mana bouba hiti nohinogo yana suhiba hilana ni'ifihe? O'e, ya mehilana'a huto ni'ibe. 35 Ya hu'ehina alihi ana bo liha'a lilube'mu nohilina le'me nehe'minogo enalalu'anigi hiti minomo mebilina'mu yabe. To ya'mana kana'alo hiti nose'na mo si ete mebilana'mu yabe.

36 Yesu bame ka mone ma luto hiti lu epi'ehina yabe. Bo moneuba yuhufa sioti'aloti ho hegege huto tafa'a sioti hokolo hu'ehilinalo hetilina'a huto meni'ibe. To ai ya hilina yuhufa sioti'a li sibina hilina'mu yabe. To ya'mana yuhufa sioti lito tafa'a siotilo hetinauba legege mehibe. 37 To bo moneuba bai nagami'i yuhufa lolo hu'ohuto lito koyapa sipisipi yagamofihi gufa'a konugu heki memalalina'mu yabe. To ai ya hilina yuhufa bai nagami'uba i kusu tito sipisipi yaga gufa'a kohi i polo tiloto bai nagami'i i hekito melugu limi su halina'mu yabe. To sipisipi yaga gufa'a kohiti i hegege hu su halina'mu yabe. 38 To yuhufa bai nagami'iya yuhufa sipisipi yaga gufa'a konugu limilina'mu yabe. 39 To bona'magi koyapa bai nagami'i a'nelete aku'i yuhufa bai nagami kumu menoepesibe. To enali ya'ma nelabe koyapa bai nagami'i bati huto yabe nelanamo ni'ibe. Yesu ya luto lu'ehina yabe.